Maharashtra Weather Forecast | येत्या ४ दिवस जोरदार पाऊस, ‘या’ जिल्ह्यांना यलो अलर्ट जारी
पुणे लाईव्ह न्यूज । २४ सप्टेंबर २०२२ । राज्यातील काही भागांत २६ ते २८ सप्टेंबर दरम्यान मेघगर्जनेसह पावसाची शक्यता हवामान खात्याकडून वर्तवण्यात आला आहे. मराठवाडा आणि विदर्भात जोरदार पावसाचा ईशारा विभागाने वर्तविलेला आहे. २६ सप्टेंबर रोजी परभणी, नांदेड, लातूर, वाशीम, यवतमाळ, वर्धा, चंद्रपूर, नागपूर, गोंदिया आणि गडचिरोलीसाठी यलो अलर्ट जारी करण्यात आला आहे. तर २७ सप्टेंबर रोजी जळगाव, औरंगाबाद, जालना, परभणी, लातूर, नांदेड, हिंगोली, बुलढाणा, अकोला, अमरावती, नागपूर, गोंदिया, चंद्रपूर, गडचिरोली, वर्धा, भंडारा या भागासाठी यलो अलर्ट दिला आहे. २८ सप्टेंबर २०२२ रोजी मराठवाडा आणि विदर्भासाठी यलो अलर्ट जारी करण्यात आलेला आहे.
गेल्या २४ तासांत महाराष्ट्र राज्यातील बहुतांश ठिकाणी मध्यम ते हलका पाऊस स्वरुपाचा पडला आहे. येत्या २, ३ दिवसांतही अशीच परिस्थिती राहण्याची शक्यता विभागाने वर्तवली आहे. मुंबई आणि आपल्या शहरात शुक्रवारी विश्रांती घेतलेल्या पावसाने शनिवारी सकाळी पुन्हा जोरात हजेरी लावली. पहाटे ७ ते ८ या तासाभरात रावळी कॅम्प येथे सर्वाधिक २८ मिमी तर सायन माटुंगा येथे २१ मिमी पावसाची नोंद झाली. पूर्व पश्चिम उपनगरातही तासाभरात जोरात पाऊस झाला.
मुंबईत गेल्या दोन आठवड्यांपासून पडत असलेल्या पावसाने काल (दि. २३ सप्टेंबर शुक्रवार) थोडी शांती घेतली. सकाळी आकाश निरभ्र असल्यामुळे ऊन पडले होते. अधूनमधून पडलेली एखादी सर वगळता संपूर्ण दिवसभर पाऊस नव्हता. दरम्यान आज (दि. २४ सप्टेंबर शनिवार) पहाटेपासून पुन्हा पावसाने मुंबईत हजेरी लावली. (Maharashtra Weather Forecast)
